Ikasle eta tituludun berri maiteok:

Atseginez ematen dizuet ongietorria Deustuko Unibertsitateko Enplegu eta Ekintzailetza Foroaren XX. ediziora. Bi hamarkadako ibilbidea ospatzen duen ekitaldi honek zuen garapen profesionalarekin eta lan munduan sartzearekin dugun etengabeko konpromisoa islatzen du.

Prestakuntza akademiko sendoa jaso duzue bikaintasuna eta prestigioa uztartzen dituen unibertsitate batean, gizarteari ekarpen positiboa egiteko pertsonak prestatzeko eginkizuna duen unibertsitate batean. Lan merkatuaren erronkei aurre egiteko tresnak, ezaupideak eta balioak dituzue. Baina, gainera, laneko orientazioan eta bitartekaritzan espezializatutako talde bat duzue eskura, zuen lanbideko karrerako etapa bakoitzean lagun izango dizuena.

Ildo horretan, funtsezko ekimenak nabarmendu nahi ditut, hala nola, lanbideko beken programak, lan munduan lehen urratsak errazteko diseinatuak, eta mentoring-a, esperientzia duten profesionalengandik ikasteko aukera paregabea, zuen ibilbidean gidatuko zaituztetenena. Era berean, Unibertsitateak ekintzailetzaren aldeko apustua egiten du garapen profesionalerako bide estrategiko gisa. Berariazko programen bidez, beren ideiak benetako proiektu bihurtu nahi dituztenei laguntzen diegu eta espiritu berritzaile eta ekintzailea indartzen dugu.

Ezin ditut aipatu gabe utzi nahi Deustuko Unibertsitateko Enplegu Atariaren garrantzia, egunero argitaratzen diren lan eskaintzak baititu, eta Alumni sarea. Zuentzat guztiontzat abantaila estrategikoa duen komunitate bat da, lotura baliotsuak eta laguntza eskaintzen dituena arlo profesionalean.

Eskerrik beroenak eman nahi dizkiet urtez urte gure ikasle eta tituludunen talentuan konfiantza jartzen duten erakundeei. Haien lankidetzak modua ematen digu aukerak eskaintzeko eta lan merkatuarekin dugun harremana sendotzen jarraitzeko.

Jardunaldi hauei ahalik eta etekinik handiena ateratzera animatzen zaituztet. Enplegu eta Ekintzailetza Foroa ez da soilik lana bilatzeko gune bat; ikasteko; partekatzeko eta hazteko plataforma bat da. Erakutsi harrotasunez zuen gaitasunak, ez izan zalantzarik bertaratutako enpresei galderak egiteko eta aztertu zuen helburu profesionalera hurbiltzeko aukera berriak.

Deustuko Unibertsitatea zuen ondoan egongo da beti, arrakasta profesionalerako bide horretan laguntzen.

Agur bero bat.
Juan José Etxeberria, SJ
Deustuko Unibertsitateko errektorea