Deustok otsailaren 26an eta 27an talentuari zabaldu dizkio ateak, XX. Enplegu eta Ekintzailetza Foroan. Hitzordu klasikoa da jada Unibertsitatean, eta 2.000 ikasle eta tituludun berri baino gehiago biltzen ditu lan bila. Topaketa horretan hainbat sektoretako 70 enpresa eta erakundek baino gehiagok parte hartzen dute, etorkizuneko profesionalak bilatzen eta errekrutatzen. Foroaren azken edizioan, 237 pertsonak aurkitu zuten lana.
Deustuko Unibertsitateko errektore Juan Jose Etxeberriak otsailaren 26an inauguratu zuen Foroa, gosari batean, eta unibertsitateko enplegua “gure garaiko erronka handienetako bat” zela esan zuen. Lan-merkatu globala aurrekaririk gabeko aldaketa izaten ari dela ziurtatu zuen. eta, testuinguru horretan, Unibertsitateak lagundu egin behar diela profesionalei laneratzen. “Gaur egun, laneko orientazioa eta bitartekaritza inoiz baino funtsezkoagoak dira Adimen Artifizialak, jasangarritasunak, demografiak eta globalizazioak markatutako merkatuari erantzuteko”, adierazi zuen. Gainera, azpimarratu zuen Deustuko Unibertsitatean enplegagarritasunari ikuspegi integral batetik heltzen zaiola, orientazioa, prestakuntza eta enpresa-sarearekiko lotura uztartuz.
Enpleguaz gain, errektoreak nabarmendu zuen ekintzailetza garapen profesionalerako bide gisa bultzatzen dela, beren ideiak proiektu bideragarri bihurtu nahi dituztenei laguntza emanez. Baina aukerak sortzeaz haratago, adierazi zuen, Unibertsitatearen ardura belaunaldi berriak gaitasun teknikoetan ez ezik balioetan ere prestatzea dela, lan merkatu bidezkoago eta jasangarriagoa eratzen laguntzeko helburuarekin.
Ondoren, Marta Aguilarrek hartu zuen hitza, Deusto Business School-Madrileko zuzendari korporatiboak. Gidaritzari eta talentuaren kudeaketari buruzko konferentziak ikuspegi berri bat eskaini zuen arlo profesionaleko pertsonen zaintzari buruz. Bere hitzaldian, “lider girafa” delakoei buruz hitz egin zuen, burua, bihotza eta ekintza konbinatzen dituztenei buruz: pertsonengan pentsatzen duten liderrak, adorea dutenak. Enpresako humanismoaren kontzeptua ere jorratu zuen, erdigunean pertsonen duintasuna jartzen duena. Ildo horretan, azaldu zuen taldea dela nagusi baten bezero nagusia, eta hark gidatu behar duela eredua emanez, bere langileak zainduz eta entzunez.
Era berean, bikaintasuna lortzeko bi ezaugarri aipatu zituen: kalitatea + berotasuna; “zer” diren erraz ordezka daitezkeela argudiatu zuen, baina “nolakoak” diren diferentzia markatzen dutela. Ildo horretan, nabarmendu zuen “maitasuna izan behar dugula gidari, eta ez beldurra”; izan ere, kasu gehienetan, pertsonek beren nagusiekin arazoak dituztelako uzten dituzte enpresak. Horregatik, komunikatzearen, entzutearen eta kalitatezko denbora eskaintzearen garrantzia azpimarratu zuen. Azkenik, sinpletasuna baloratu zuen eta “jakintsuen bertutea” dela esan zuen.
