“”
Adela Balderas
“Biderik nobleena ez da besteak menderatzea, baizik eta nork bere burua hobetzea”
Sokrates
Denaren hasiera
“Ezagutu ezazu zeure burua” da antzinako greziar aforismo ospetsuenetako bat, Apolo jainkoaren tenpluaren sarrerako arkupean dagoena, Delphos hirian (K.a. IV. mendea).
Kontraesanen, ezbeharren eta aukeren garaian bizi gara; beldurraren eta kuraiaren garaian; isolamendu sozialaren eta exhibizionismo digitalaren garaian; jakintza fake news-ekin batera agertzen den garaian. Bizi garen garai honetan, agian sentiberagoak gara haserrearekiko, asegabetasun kolektiboarekiko, ziurgabetasunak uzten duen hutsunearekiko, sentiberagoak ahotsa kentzen zaien pertsonen minarekiko, kezkak gure osasun mentalean uzten duen aztarna ezabaezinarekiko, elkartasun faltarekiko eta norberekoikeriarekiko, pertsona desberdina gaizki tratatzearen bidegabekeriarekiko. Eta, hala ere, geure burua gutxien ezagutzen dugunak gara.
1995ean, Daniel Golemanek hau zioen: “norberaren ezagutza, hau da, norberarengan sentimendu bat agertzen den unean bertan ezagutzeko gaitasuna da adimen emozionalaren giltzarria”. Emotional Intelligence (Adimen emozionala) liburuagatik mundu osoan ezaguna den psikologo honek, 1995ean eta gaur egun arte, ideia trenkatzaile hau zabaldu zuen: kudeaketan arrakasta izateko erabakigarria ez da koefiziente intelektuala edo prestakuntza teorikoa edo teknikoa, adimen emozionala baizik.
Enpresa munduan hasten den norbait oso azkarra eta trebatua bada ere, porrot egin dezake bere burua ondo ez ezagutzeagatik. Beraren emozioak, talentuak eta potentziala ezagutzeko gai ez bada, nekez kudeatu eta ulertu ahal izango ditu. Daniel Golemanek zioen bezala, enpresa munduan jokoaren arauak aldatzen ari dira, eta epaitu, saritu eta arau berrien arabera aukeratzen gaituzte. Prestakuntza eta esperientzia ez ezik, nolakoak garen, nola jokatzen dugun, erresilientziarako zer gaitasun dugun, zer aztarna uzten dugun eta guk geure burua kudeatzeko eta besteen emozioak kudeatzeko nola moldatzen garen ere garrantzitsua da.
Gure kontzientzia-maila handitzeko garaia da, nolakoak garen zalantzan jartzekoa, geure buruari ondo egoten uztekoa, gaizki egoteko baimena ematekoa, eboluzionatzekoa, “beti izan naiz horrelakoa” aitzakiatzat hartuta geure burua engainatzeko mantra automatizatu gisa hainbestetan errepikatzen duguna eta arnasa hartzen uzten ez digun, areago aurrera egiten uzten ez digun kontsolamenduzko esaldiaren aurrean errebelatzekoa.
Eta gaur den garai honetan, inoiz baino gehiago sentitzen dut geure burua ezagutzea gu geu errespetatzea dela. Inoiz baino gehiago sentitzen dut geure burua ezagutzea geure burua zaintzea dela.
Eman zeure buruari denbora. Ekintza
16 pertsonalitate ezagunen testa Myers-Briggs motako (edo MBTI ingelesezko sigletan) adierazle ezagunean oinarrituta dago. Tipologiei buruzko azterlan bat da, pertsonen lehentasun motak sailkatzen dituena. Doako testa da, eta, muga batzuk izan arren, indarguneak eta ahulguneak ondo orientatzen laguntzen du.
Hartu 15 minutu erantzunak ondo pentsatzeko eta gutxi gorabehera nor zaren eta gauzak zergatik egiten dituzun egiten dituzun bezala deskribatuko dizu.